„Албанците се зближиле на политичко ниво“ – Таравари: Албанците во Македонија приоритет на Албанија и Косово

Еден од лидерите на коалицијата ВЛЕН, министерот Арбен Таравари, преку објава на Фејсбук ги коментираше најновите меѓународни случувања, со посебен акцент на тензиите меѓу САД и Европа. Според него, меѓу сите глобални превирања се случува „уште едно чудо“ – како што вели, позитивно – бидејќи оваа ситуација ги зближила Албанците и нивните држави повеќе од кога било. Тој истакна дека безусловната соработка меѓу двајцата албански премиери, Курти и Рама, на меѓународните средби е едно од најголемите изненадувања во последните 25 години.

„Кај Албанците започна едно ново сојузништво, прво од ваков вид во поновата историја. Уште поважно, Албанците во Македонија не само што не се изоставени од ова помирување, туку се повеќе вклучени од кога било. Дури станавме приоритетен фокус на двете албански држави, а да бидам искрен, конечно добиваме тоа што не само што го заслужуваме, туку и тоа што ни беше одложено“, вели Арбен Таравари.

Додека светот се соочува со нестабилност, Таравари потенцира дека Албанците значително се зближиле на политичко ниво.

Оваа негова објава, која доби лајк и од амбасадорот на Албанија во Македонија, Денион Меидани, предизвика внимание во медиумите, а беше пренесена и во Албанија. Телевизијата Top Channel објави со наслов: „Лидерот на албанската коалиција во Северна Македонија: Албанците во Македонија, приоритетен фокус на Албанија и Косово“.

Аналитичарот Сефер Селими смета дека статусот на Таравари повеќе има функција да го позиционира како водечка фигура во ВЛЕН.

„Пораката беше малку конфузна, без јасен фокус и без конкретна публика. Сепак, мислам дека оваа изјава, изградена врз концептот на надпартиски и општонароден дух, служи за етаблирање на Таравари како водечка личност на ВЛЕН. Реакциите што ги предизвика, како во македонските, така и во албанските медиуми, сугерираат дека ова е дел од процесот на негово позиционирање.“, вели Сефер Селими.

Што се однесува до содржината на статусот, Селими смета дека таа не е целосно одржлива, бидејќи, според него, Албанците никогаш не биле поделен лидерски како сега. Тој потсетува на вмешаноста на Курти во изборниот процес во Македонија, како и на тензичниот однос и судирот од далечина меѓу Рама и Курти.