Министерот за дигитална трансформација, Стефан Андоновски, во гостување во емисијата Клик Плус на ТВ21 истакна дека земјата има капацитет да аплицира и успешно да ги реализира европските проекти и средства.
„Има повеќе средства отколку што се искористуваат. Добар пример е годинешното искористување на средствата преку програмата „Еразмус“, каде аплициравме повеќе проекти отколку што Европската Унија обезбедила средства. Тоа покажува дека со текот на времето научивме како да ги аплицираме и користиме средствата“, рече Андоновски.
Тој додаде дека Министерството за дигитална трансформација успешно завршило два проекти со ЕУ и започнува три нови проекти преку ИПА програмата.
„Покажавме капацитет да аплицираме и да ги добиеме проектите, а сега ќе покажеме и дека можеме да ги реализираме. Наследив пет заглавени проекти, од кои четири беа со Европската Унија, кои застанаа поради недостиг на домашен капацитет. Сега го надминуваме тоа“, истакна министерот.