Вреди добива уште еден пратеник? Еве кој се очекува да го замени Салим Сулејмани по оставката

По излегувањето од коалицијата Вреди, во крилото на Арбен Таравари во Алијансата за Албанците започнаа внатрешни поделби. Денес Салим Сулејмани објави дека поднел оставка од сите партиски функции во партијата, но и од функцијата пратеник во Собранието на Македонија, пренесува ТВ21.

Оттука се поставува прашањето – кој ќе го замени Сулејмани во Собранието?

Според листата на коалицијата Вреди од парламентарните избори, во Петтата изборна единица веднаш по Салим Сулејмани следува педијатарката Валбона Адили-Емини, кадар на движењето Беса и дел од Вреди. Со тоа, Валбона Адили-Емини би станала нова пратеничка, а коалицијата би добила вкупно 10 пратеници во новото парламентарно мнозинство по заминувањето на Таравари.

Истовремено, со оваа промена, АА-Таравари ќе ја изгуби можноста за формирање на пратеничка група, бидејќи според правилникот за работа на Собранието, за формирање група се потребни најмалку пет пратеници – број што ова крило веќе го нема.