Дел остануваат во ВРЕДИ, друго поднесуваат оставки – Мицкоски: Оваа недела многу работи ќе станат појасни

Елфете Исмаили од АА – Таравари соопшти дека поднела оставка од функцијата заменик-министерка за одбрана. Исмаили му се заблагодари на премиерот Мицкоски и на Таравари за укажаната можност. Оваа оставка следи по излегувањето на АА од Владата. Оставка како што е познато поднесе и Таравари од функцијата министер за здравство, а констатирањето треба да се случи утре во Собранието. Но, кој ќе биде новиот министер на негово место?

Веќе е познато дека крилото на Таравари не преминува целосно во опозиција. Вицепремиерот Арбен Фетаи потврди дека останува во ВРЕДИ, додека пратеникот Салим Сулејмани поднесе оставка. Со реакција на социјалните мрежи се огласи Таравари:

-Патот на Арбен Џафери не поминува низ Влада која те нарекува 20%. Патот на Промената не поминува со закани за затвор за Албанците! Патот на Промената не поминува со продажба на пратеничка функција за да се стане амбасадор во Арабија. Патот на Достоинството не поминува со напуштање на партијата за министерска фотелја, вели Арбен Таравари од АА.

Сепак, од ВРЕДИ велат дека инсистирањето во АА да не завршат во прегратките на Али Ахмети е многу посилно од калкулациите на Таравари.

-Одлучноста и инсистирањето да не се заврши во прегратките на Али Ахмети е многу поголемо од калкулациите на г. Таравари. Според сите информации што ги имаме, овој револт ќе продолжи уште повеќе и ќе се материјализира, бидејќи постои силна определба да се донесе уште поголема промена на политичката сцена, рече Орхан Муртезани од ВРЕДИ.

Инаку, и поранешниот министер за информатичко општество и администрација, Азир Алиу потврди дека останува во ВРЕДИ. Извори на ТВ21 дознаваат дека Алиу е можен кандидат за министер во владата ВМРО-ВРЕДИ, но не се прецизира дали тој ќе раководи со Министерството за здравство или ќе има размена на ресори во рамките на ВРЕДИ.