ДУИ: Вреди беше демантирано од претседателството на Косово – Вреди: Косовските власти изразуваат сомнежи дека инцидентот е провокација

Опозициската ДУИ  преку писмена реакција вели дека соопштението на косовското претседателство ги откри сите, како што велат, лаги на вазалите и слугите од ВРЕДИ за да се замолчи и минимизира најголемиот дипломатски скандал во историјата на државата. .

„Сите експоненти на ВРЕДИ имаа образложение, различно еден од друг, а сите беа демантирани од Претседателството на Косово, од МВР и од концесионерот ТАВ. Овој скандал мора да се расчисти до крај и веднаш да сносат политичка одговорност нелегитимните узурпатори на институциите, Астрит Исени од МВР и Африм Гаши од Собранието. Дивото и недозволиво однесување на шефот на обезбедувањето на нелегитимниот претседател на Собранието по налог на Африм Гаши, како и институционалното незнаење на Астри Исени, кој не ни знаеше за скандалот е неприфатливо“, велат од ДУИ.

Одговорија од владината коалиција ВРЕДИ. Тие велат дека ДУИ се обидува да манипулира со јавноста. Според ВРЕДИ, косовските власти јасно и недвосмислено го изразиле своето сомневање дека инцидентот бил намерно испровоциран со цел да се влошат билатералните односи со Косово.

„Бидејќи ДУИ испраќа панични соопштенија, а ние не сакаме да ја попречиме истрагата, денес ќе поставиме две прашања до опозициската ДУИ:

-Кој вработен на аеродромот, кој објавува фотографии на социјалните мрежи со лицето А.Г. се појавил на лице место на инцидентот и со кои намери и причини?

-Колку криминал имаат направено поранешни функционери на ДУИ кога на ваков подмолен начин се обидувате да ја вовлечете Претседателката на Косово, Вјоса Османи, во обид да креирате тензии за да ги направите Албанците заложници за да се спасите од правосудна одговорност?

Ова не ви поминува, доаѓа време за вистината, вашиот срам ќе биде огромен!“, велат од Вреди.

Со соопштение излезе и опозициската партија СДСМ од која велат дека очекува МВР и внатрешната контрола што поскоро да излезат со детални информации што точно се случило на скопскиот аеродром и каква била улогата на луѓето од обезбедувањето на претседателот на Собранието Африм Гаши. Доколку МВР не го направи ова, според СДСМ, тоа ќе биде јасна потврда дека се кријат фактите за да се заштитат односите меѓу коалицијата. СДСМ има целосни информации што точно се случило и доколку МВР се обиде да ги смени фактите се ќе биде објавено“, се вели во реакцијата на социјалдемократите.