Екипата на Црвен крст – Охрид, избркана од пунктот за вакцинација

ПОСЛЕДНИ ВЕСТИ

Црвениот крст од Охрид, на нивната официјална страница на Фејсбук напишаа дека биле повикани од страна на директорката на Здравствен дом од Охрид, да помагаат во процесот на имунизација во вакциналниот пункт, каде како што велат, кога пристигнале биле грубо избркани од страна на координаторот на спроведување на масовната вакцинација во Охрид, Сашо Денесовски.

„Почитувани сограѓани,
Со жалење и неверување Ве известуваме дека денес, 04.05.2021 г., во 8 ч. екипата на Црвен крст Охрид која на барање на Директорката на Здравствен дом Охрид беше повикана да помага во процесот на масовна вакцинација во спортската сала Билјанини извори, беше грубо избркана од страна на Сашо Денесовски, т.н. координатор на спроведување на масовната вакцинација во Охрид.
За жал и овој пат личните комплекси и фрустрации на една личност победуваат пред потребите за асистенција и помош на лицата кои се вакцинираат и на олеснување на административната работата на оние кои се вклучени да го спроведуват вакциналниот процес, што е активност на волонтерите на Црвениот крст во сите земји во светот каде се спроведува масовна вакцинација против Ковид-19.
Нашите волонтери остануваат подготвени доколку има потреба да продолжат во помагање и олеснување на процесот на вакцинација против Ковид-19 на вакциналниот пункт на Здравствен дом Охрид во Општата болница Охрид“, напишаа на објавата на Фејсбук.