Шефот на опозициската Алтернатива, Африм Гаши, смета дека претседателот Стево Пендаровски го дал одговорот на неговото прашање од пред неколку дена „дали првиот човек на ДУИ, Али Ахмети побарал амнестија за поранешниот премиер Никола Груевски“.
„На нашето прво јавно прашање – дали Ахмети ги молеше, до небо, некои од меѓународната заедница, на средба во Скопје, да дозволат амнестија за Груевски, одговори Пендаровски. Ви благодариме Претседателе што ја потврдивте нашата информацијата“, вели Африм Гаши.
Претседателот во емисијата „Трилинг“ призна дека актери од политичката сцена го консултирале за амнестијата на Груевски, но без да прецизира од кој блок дошле овие актери.
„На неформално ниво, некои политички актери ме консултираа за оваа можност, што јас мислам, но јас цврсто им кажав дека никогаш нема да го направам тоа“, додава Стево Пендаровски.
Но потоа преку соопштение од неговиот кабинет беше појаснето дека предлозите да се разгледа помилување на одредени политичари или да се поддржи донесување на закон за амнестија дошле од луѓе блиски до опозицијата.
„Тие предлози преку посредници до претседателот Пендаровски ги испратија политичките и безбедносните структури кои се блиски до сегашната опозиција, но и поранешни политичари“, велат од Кабинетот на Пендаровски.
Ваквото појаснување од претседателскиот кабинет дојде по прес-конференција на опозициската партија ВМРО-ДПМНЕ, која побара од Пендаровски да каже од каде е барањето за амнестија на поранешниот премиер Груевски.