Гаши и Заев се ракуваа, потпишаа договор за влез на Алтернатива во Влада

Потпишан договорот за влез на Алтернатива во Влада. Лидерот на партијата, Африм Гаши се ракуваше со премиерот Зоран Заев за да ја продолжат работата на актуелната Влада до 2024 година.

Потпишаниот договор содржи 9 точки преку кои ќе се стремат кон унапредување на владината програма. Меѓу првите точки се:

-Владата да ги мобилизира сите капацитети на државата со цел отворање на преговорите со ЕУ.

-Владата да достави официјално барање до Европската комисија преку кое ќе побара тим од независни експерти кои ќе вршат меѓународна истрага на процесите за кои постојат одредени сомневања како што се: Монструм, Алфа, Диво Насеље и Малиот Алмир.

Иако претходно ја потпиша иницијативата за уривање, Гаши вели дека никогаш не рекол оти актуелната Влада е криминална.

Со приклучувањето на Алтернатива во Влада, парламентарното мнозинство ќе брои 64 пратеници. Двајцата лидери оценија дека нема потреба од предвремени избори, уверувајќи дека оваа Влада ќе продолжи да работи до истекување на мандатот – до 2024 година.