Испитниот центар го става на мирување штрајкот – по настојувањата на министерот дека државната матура ќе се одржи на 27 мај

Министерот за образование и наука, Јетон Шаќири, не се откажува и покрај штрајкот на вработените на Државниот испитен центар, и вели дека државната матура ќе се одржи на 27 мај.

Реагираа од Синдикатот на ДИЦ, од каде велат дека штрајкот ќе го стават во мирување. Пишуваат дека настојувањата на министерот за спроведување на државната матура без учество на вработените на Испитен центар би ги оштетил матурантите.

„Насилните мерки и притисоци на министерот Шаќири со обид да внесе надворешни лица во процесот на државната матура – процес кој е со висок степен на тајност, ќе ја доведе во прашање валидноста на тестирањето и резултатите од матурата. Вработените во Државниот испитен центар, како експерти во областа и лица со висок интегритет и чувство за општествена одговорност, одлучија да ја одложат борбата за своите права за достоинствен живот во корист на вашата иднина. Со ова известување штрајкот се става во мирување!“, велат од синдикатот.

Од Синдикатот испратија порака и до министерот, додавајќи дека неговите досегашни обиди за решенија на проблемот  и ветувањата кои им ги дадовте на матурантите во медиумите се спротивни на одредбите на Правилникот за процедури за тајноста на подготовката, печатењето, дистрибуцијата, чувањето и оценувањето на испитниот материјал.

Од друга страна министерот Шаќири денеска изјави дека се бара системско решение со колективен Договор за вработените на ДИЦ, а вели дека ги поддржува барањата на вработените, но според него штрајкот не е решение поради тоа што државната матура треба да се одржи.