Комисија ќе ги утврдува условите за трансформација на работниот однос на вработените во образовни институции во Охрид

ПОСЛЕДНИ ВЕСТИ

Посебно формирана комисија ќе ги утврдува условите за трансформација на работниот однос од определено во неопределено работно време на вработените во образовните институции на подрачјето на Општина Охрид.

Решението за формирање на општинската комисија го донесе градоначалникот Кирил Пецаков, по номинациите добиени од Министерството за образование и наука и од СОНК.

Од Општина Охрид појаснуваат дека на тој начин ќе се надмине застојот во работата на досегашната комисија на која и беше истечен мандатот.

-Сега на овој процес ќе му се даде дополнителна динамика. Задоволен наставен кадар со решен работен статус е најдобра гаранција и дополнителен поттик за успешен образовен процес што претставува стартешка цел и определба на Општина Охрид, велат од Општина Охрид.

Во решението за формирање на Комисијата стои дека нејзина задача е да изврши стручни и административно технички работи со кои ќе се сумираат, проверуваат и технички ќе се обработуваат барањата за трансформација на работниот однос од определено на неопределено работно време на вработените во образовните институции на подрачјето на Општина Охрид и истите навремено ќе се доставуваат до Министерството за образование и наука.