Новата претседателка на Македонија: Јас сум пешак, ги знам сите луѓе на пазарот Буњаковец и Зелен, на крај си купувам цвеќе

Новата претседателка на Македонија, Гордана Силјановска Давкова пред повеќе од еден месец (03.04.2024) во студиото на ТВ21 откри дека сака сама да се движи низ градот, но и да ги посетува пазарите.

„Јас сум пешак, пешки доаѓам на работа, не возам, среќавам луѓе, се чувствувам пријатно во градот, ги знам годишните времиња. Ги знам сите луѓе на пазар, на Зелен и на Буњаковец, од првата до последната тезга. Сакам на крајот да си купам цвеќе“, порача тогаш Силјановска Давкова.

На тогашното посочување од страна на водителот на емисијата, дека доколку стане претседател на државата, нема да може сама да се движи, таа вели дека тоа се големи дилеми и ќе размисли дали ќе го „жртвува“ пазарот и одењето пешки кое ја прави среќна.

„Можеби можат да се сменат правилата“, рече Силјановска Давкова.

Инаку, денеска во Собранието во 12 часот е инагурацијата на првата жена претседател на Македонија, а потоа ќе се одржи и официјална церемонија на примопредавање на функцијата Претседател со највисоки државни и воени почести.