Двајцата полицајци од граничната полиција кои ги фатија камерите како примаат поткуп беа суспендирани но и натаму примаат дел од платата. Денеска министерот за внатрешни работи, Оливер Спасовски рече дека дисциплинската постапка се уште трае. Дали имало и други вклучени во овој скандал како што истакна Спасовски, ќе се открие по целосно расчистување на случајот.
Тв21 ПРАША ВО Обвинителство до каде е постапката, а оттаму со одговор:
„По предметот за кој покажувате интерес надлежен обвинител активно постапува и во рамките на своите надлежности прибира докази неопходни за расчистување на случајот. Во моментов не може да се споделат повеќе детали за настанот.“ велат од ЈО.
Видео снимките на кои се гледаат полициски службеници како земаат по 20 евра по лице за да ја поминат полесно границата на Блаце, биле обезбедени порано но беа објавени по завршување на полициската акција преземена од структурите СПАК од Албанија и ИПК во Косово во која беа уапсени 26 полицајци за злоупотребана службената должност.
Инаку во Северна Македонија, според КЗ, службено лице кое прима поткуп, добива казна затвор од 4 до 10 години.