Османи-Џачка: Полноправно членство во ЕУ 2030 година е реална можност

ПОСЛЕДНИ ВЕСТИ

Повторно заеднички успешно минуваме низ скрининг процесот, ги спроведуваме внатрешните реформи и одлучно чекориме кон полноправно членство во ЕУ. 2030 е реална и дофатлива можност за Северна Македонија и Албанија успешно да го заокружиме овој процес и јас лично верувам во тоа, нагласи денеска министерот за надворешни работи Бујар Османи на заедничката прес-конференција со неговата албанска колешка Ољта Џачка.

На средбата со албанската министерка за Европа и надворешни работи, како што посочи, се согласиле дека споделуваме исти стратешки надворешно политички приоритети.

-Сојузници во НАТО со стопроцентна хармонизација на својата надворешна политика со заедничката надворешна и безбедносна политика на ЕУ, тоа испраќа јасна порака за нашата јасна припадност и посветеност на западните принципи и вредности, рече Османи.

Инфраструктурното поврзување преку Коридрот 8, како што посочи Османи, останува приоритет, за што во тек се подготовките за започнување на автопатската поврзаност.

-Треба да продолжиме со интензивни активности за имплементација на обврските и искористување на придобивките во рамки на регионалните иницијативи, тука пред се мислам на Берлинскиот процес. Економската соработка е успешна, но недоволна, потребна е нашата обврска да им обезбедиме на бизнисите и на граѓаните уште повеќе потенцијали за размена и соработка, потенцира Османи.

Албанската министерка Џачка посочи дека дискутирале за начините како може да се интензивира соработката не само во инфраструктурата, туку и во делот на енергијата, трговската размена, културата, туризамот и образованието.

-Делиме заедничка визија. Нашите влади имаат пријателска и конструктивна комуникација за широк спектар на прашања. Се чувствувам горда што соработката меѓу двете земји е модел за соработка меѓу соседите во нашиот регион. Нашите држави не само што успеваат да ги интензивираат работите на билатерално ниво туку даваат придонес се поголем во регионална смисла, а посебно во гаранцијата на нејзната ориентација кон евроантлантските перспективи, рече Џачка.

Утре, како што информира Османи, ќе има министерски состанок на САД-Јадранската повелба под претседавање на нашата земја каде ќе се разговара за регионалните предизвици, но и за новите состојби во меѓународните односи предизвикани од руската агресија во Украина.