Османи со план за нормализација на ситуацијата во Косово – Пендаровски: Имаме 65 војници во Косово, треба да придонесеме за сигурноста

ПОСЛЕДНИ ВЕСТИ

Бујар Османи, објави план во девет чекори за деескалација и нормализација на тензиите на северот на Косово. Планот, како што се наведува во соопштението од Министерството за надворешни работи, е во насока на постигнување траен мир и стабилност на северот на Косово и враќање на косовските Срби во институциите и демократските процеси.

„Како прв чекор, планот превидува Косово и Србија да ја реафирмираат посветеноста кон основниот договор и Охридскиот протокол. Понатаму се предлага Косово да ги повлече специјалните полициски сили, а Србија да ја намали борбената готовност на вооружените сили. Трето, на полицијата на Косово, заедно со силите на КФОР и ЕУЛЕКС, да им се овозможи во целост да се грижат за редот и безбедноста на земјата. Понатаму се предлага протестите да се откажат и да се стават во функција општинските функции и услуги, за нормално функционирање на општествениот живот и да се дозволува пристап на вработените во општините“, велат од МНР.

Петтиот чекор подразбира градоначалниците да поднесат оставки до летото оваа година, отворајќи го патот за предвремени општински избори оваа година.

ОБСЕ ќе го поддржи изборниот процес, преку техничка поддршка на косовските власти кои ќе ги организираат изборите и ќе ги ангажира младите во програмите и процесите за помирување. Последниот чекор се однесува на тоа ОБСЕ да ги стави своите капацитети на располагање за поддршка на имплементацијата со добра волја од двете страни на договорените одредби и продолжување на дијалогот.

Во интевју за РСЕ, претседателот на Македонија Стево Пендаровски рече дека активно се следи состојбата на Косово.

„Како членка на НАТО ја следиме директно. И како членка на Алијансата, која има свои војници на Косово. Нашите војници не се на северот на Косово распоредени, меѓутоа имаме 65 војници таму,. Имаме намера да останеме и во догледна иднина да го зголемиме тој контингент заеднички придонесуваме во сигурноста на регионот. Ако ние придонесуваме за стабилноста на Косово, со кое сме директни соседи, придонесуваме и за нашата стабилност и безбедност.“, рече Пендаровски.

Претседателот додаде дека проценките на Алијансата се дека состојбите во Косово одвреме на време доаѓаат до точка на вриење, меѓутоа силите на Алијансата ќе бидат засилени со цел да не дозволат прелевање на нестабилноста.