Претседателот на Иран Ебрахим Раиси кој загина во хеликоптерска несреќа денеска беше погребан

ПОСЛЕДНИ ВЕСТИ

Денеска беше погребан претседателот на Иран Ебрахим Раиси, кој загина во хеликоптерска несреќа.

Тој беше погребан во светиот град Машхад во североисточниот дел на земјата, каде илјадници ожалостени ги исполнија улиците по повод погребот. 

Раиси, кој имаше 65 години, често се сметаше за можен наследник на 85-годишниот врховен лидер Али Хамнеи, кој ја држи највисоката позиција во Иран. Мохамад Мокбер, кој е прв потпретседател, ќе биде вршител на должноста претседател до изборите на 28 јуни.

На погребната церемонија присуствуваа ирански политичари и воени лица, како и верски претставници. Цвеќиња беа фрлани од толпите ожалостени кон бавно движечкиот камион со ковчегот, пред да биде погребан во „Имам Реза“ – најголемото исламско светилиште во земјата. Раиси е роден токму во Машхад.

Претходно, илјадници граѓани оддадоа последна почит додека ковчегот се движеше во кортеж низ источниот град Бирџанд.

Осум патници и членови на екипажот загинаа кога во неделата хеликоптерот со кој се превезуваа се урна во планински терен близу границата со Азербејџан. Меѓу нив беше и министерот за надворешни работи, Хосеин Амир Абдолахиан, кој претходно денеска, исто така беше погребан.

Иран прогласи петдневна жалост по смртта на Раиси.