СДСМ е против промена на државниот грб – Касами бара смена и на „20%“ за јазикот

Дел од партиите објавија предлози како да изгледа новиот државен грб. Либерал-демократите предложија тоа да биде рисот, бидејќи бил уникатно заштитено животно кое потекнува од Шар планина, а би се согласиле и за сокол. Дебатата започна откако премиерот Мицкоски кажа дека ова прашање било отворено.

„Ние ова прашање го отворивме и ценам дека ние сме една од ретките држави, пост-социјалистички, коишто се уште државниот грб го имаат оној стариот, со мали модификации.“, вели Христијан Мицкоски.

Биљал Касами од Движењето БЕСА се согласува да биде променет државниот симбол кој, како што вели, потсетува на минатиот политички систем, но зборуваше и за целосен уставен пакет.

„Спремни сме да зборуваме за предлог каде секако ќе се разгледува грбот, прашањето за химната, но и прашањето за други уставни измени поврзани со унапредувањето на албанските права или прашањето за несоодветното дефинирање на албанскиот јазик во Уставот, како јазик на 20 отсто.“, вели Биљал Касами.

Опозициската СДСМ најави дека ќе се спротивстави со сите демократски средства против промена на државниот грб. Според нив, актуелниот грб е соодветен и не создава етнички поделби. Венко Филипче упати и прашања до ВМРО-ДПМНЕ.

„Дали можеби внатре во коалицијата со ВЛЕН, давајќи го овој предлог за измена на државниот грб, можеби не се разговара внатре во коалицијата и за измена на химната? Тоа е нешто на што ВМРО-ДПМНЕ треба да одговори.“, вели Венко Филипче.

„Она коешто е отворено за разговор е прашањето за оној комунистички грб којшто го имаме во Република Македонија.“, вели Бране Петрушевски.

Државниот грб се менува со двотретинско мнозинство. Последно, ваква иницијатива имаше поранешниот премиер Никола Груевски, кој навиваше за црвен лав на златна позадина.