Прекрасниот пејзаж кај езерото Треска е оставен на милост и немилост на судбината. Честопати го спомнуваат разни функционери, но никако да се средат работите околу ова вештачко езеро. Синоќа во емисијата Клик Плус градоначалникот на Скопје, Петре Шилегов рече дека надлежностите за Треска не и ги предал на општина Сарај туку тоа го сторил неговиот претходник, Коце Трајановски.
Градоначалникот на општина Сарај, Блерим Беџети вели дека додека било под надлежност на Град Скопје, езерото Треска било уништено.
„Не е на нивно ниво да дискутираат за надлежностите зошто и се дадени на општина Сарај. Тие можат политички да го третираат тоа, но езерото Треска се наоѓа во општина Сарај. Со години е уништувано. Од моментот кога го преземавме менаџирањето на езеро Треска денес се зборува до каде сме стигнале со проекти, тоа е најдобар доказ дека одлуката била исправна“, истакна Блерим Беџети.
Беџети додава дека наскоро се очекува да се усвои и детален урбанистички план за езерото. Отидовме кај езерото Треска. Има уште многу да се направи околу уредувањето на амбиентот тука.
„Секој пат пред избори на жителите на Сарај им се ветува дека ќе се смени состојбата на езеро Треска и дека ќе има странски инвестиции за средување на езерото. Но никогаш тоа не се случило. Тоа го ветувале и градоначалници на Скопје и на општина Сарај“, посочи репортерот на ТВ21.
Езерото Треска е во близина на туристичкото место Матка. Но иако не е во најдобра состојба, ова место сепак привлекува посетители во текот на летниот период.