Синдикатот на култура бара повисоки плати, министерката се правда дека изминатите 4 години добиле 52% зголемување

И Синдикатот и министерката за култура Бисера Костадинова Стојчевска излегоа на посебни прес конференции на кои се зборуваше за барањата на синдикалците за зголемување на платите во културата. Од синдикатот соопштија дека изјавите за покачување на платите од 12 проценти не се точни, туку дека тоа изнесува само 2 проценти. Најавија протести и тужби поради непочитување на правото на плата. Министерката пак истакна дека нема промени во општиот колективен договор, ниту во колективниот договор на културата, а дека платите во изминатите 4 години биле зголемени за 52 проценти.

„Не убедуваат дека немаме право на 10 проценти од општиот колективен договор бидејќи со покачувањето на минималната плата ќе земеме 12 проценти покачување според колективниот договор за култура. И тука веќе постојат тие 10 проценти од општиот колективен договор за јавен сектор. Тука е замката на реториката затоа што нема да земеме 12 проценти покачување за месец март туку реално само 2 проценти.“, вели Вера Атанасовска, претседателка на Сидникатот на култура.

Одговори министерката Бисера Костадинова Стојчевска.

„Последниот пат кога се доби 10 посто покачување беше во септември 2023 година, а во текот на цела 2023 година вкупно 21 посто покачување на нивните плати по член 14 став 1 од општиот колективен договор. На крајот фер е да кажеме дека во изминатите 4 години од 2020, изнесува 40 посто. Со ова последно покачување во март покачувањето е 52 посто на нивните плати.“, рече Костадинова-Стојчевска.