Убиството на хрватскиот ракометар Денис Тот ја потресе земјата, но случајот се уште не е целосно расчистен. Притвор од 30 дена им е изречен на момчето и девојката кои се обвинети за убиство, нанесувајќи му телесни повреди на ракометарот, а третото лице е во бегство. Надлежните првично соопштија дека смртта не била насилна, а потоа соопштија дека Тот бил брутално претепан, од КАРИЛ целата документација била испратена до здравствениот инспекторат и дека ракометарот бил примен без видни телесни повреди. Но, случајот со убиството на хрватски ракометар почна да добива политичка димензија.
Лидерот на ВМРО-ДПМНЕ Христијан Мицкоски рече дека надлежните институции наместо да го решат случајот, го кријат настанот. Според него, дополнителни сомнежи се создадени од различни соопштенија на МВР и лекари од КАРИЛ.
Од ВМРО дпмне велат и дека надлежните досега трипати ги менувале изјавите и официјалните соопштенија. На овие изјави реагираа од СДСМ, кои истакнаа дека институциите постапуваат согласно нивните законски надлежности. Според нив, срамно е да се политизира вакви случаи, особено по информациите дека бараниот е нивен поддржувач.
„Што зборуваат фотографиите на кои лицето по кое се трага е сликано со Христијан Мицкоски, по истата изместена логика на ВМРО-ДПМНЕ? ВМРО-ДПМНЕ да престане да си ја ишка мувата од капата и да остави надлежните институции да го расчистат до крај убиството кое го потресе регионот. Денес, никој не е привилегиран пред законите, секој кој сторил какво било кривично дело одговара пред надлежните судови“, се вели во реакцијата на СДСМ.
На социјалните мрежи е објавено и видео за кое се претпоставува дека е од убиството на Тот. ТВ21 праша во МВР но оттаму истакнаа дека случајот сега е во Обвинителство и не можат да даваат информации.
Случајот го пренесоа и странските медиуми, а словенечките медиуми објавија за едно од имињата кое се совпаѓа со името на првоосомничениот кој е осуден за трговија со дрога.
Хрватскиот ракометар Денис Тот кој настапуваше за ракометниот клуб Бутел, на 7 април годинава беше пронајден во бесознание во близина на позната дискотека во Скопје. Наредниот ден Тот почина на клиниката КАРИЛ како последица од пад на асфалтот.Погребот е утре во родното Ѓаков во Хрватска.