Уапсен Раде Трајковски – Штекли

Попладнево е уапсен Раде Трајковски – Штекли, потврдуваат од МВР за ТВ21.

„Во полициска акција лицето за кое прашувате по Наредба на ОЈО за ГОКК е лишено од слобода“, велат од МВР за ТВ21.

Тој се сомничи за трговија со дрога, односно предводел група од над десетина члена кои се занимавале со продажба на наркотични средства.

Како што дознава ТВ21, одземен е и телефон од висок полициски службеник кој се сомничи за оддавање информации поврзани со клановите Барон, Беланоца, Грчец и Штекли.

Штекли стана познат во јавноста по неговото поврзување со убиството на фудбалерот Мартин Јанушев, но подоцна обвинение беше поднесено против Филип Секуловски – Кобра. Во 2011 година бил уапсен во Италија поради местење натпревари во калчо лигата, а во 2021 година бил уапсен во Белград.

Изминативе две години имаше три пати обид за негово убиство.

Трајковски (август и октомври 2023) беше мета на два напади во трговскиот центар „Ист Гејт“, каде што преживеа пукање со огнено оружје.

Видеото од едниот инцидент стана вирално и на социјалните мрежи каде масовно се споделуваше.

Потоа (ноември 2024 година) во неговиот двор во скопската населба Керамидница беше фрлена експлозивна направа, а за истата имаше најави на познатата апликација Тик Ток.

Во сите три напади Штекли беше повреден, а во еден од нападите и му беше отстранет дел од белите дробови.

„Направена е обемна интервенција на левиот граден кош. Отстранет е дел од белите дробови оштетен од куршуми. Беа третирани рани на десното рамо. Пациентот ја поминал ноќта на интензивна нега, утрото бил стабилизиран. Тој е во состојба на свест со спонтано дишење и е под опсервација и на интензивна нега во Карил“, нагласи тогаш д-р Неџат Јакупи во изјава за ТВ21.