ВИДЕО: Силјановска Давкова при заклетвата не го кажа уставното име „Република Северна Македонија“

Новата претседателка на државава, Гордана Силјановска Давкова денеска во Собранието положи заклетва за функцијата Претседател.

Таа при својата свечена изјава, која ја повторуваше по претседателот на Собранието Јован Митрески, не го кажа уставното име „Република Северна Македонија“ туку употребуваше само Македонија.

„Изјавувам дека функцијата претседател на Македонија ќе ја вршам совесно и одговорно, ќе го почитувам Уставот и законите, ќе го штитам Суверенитетот, територијалниот интегритет и независноста на Република Македонија“, порача Силјановска Давкова.

Во својата свечена изјава пред присутните, таа наведе дека ниту таа верувала дека ќе стане шеф на државата, како што во нејзина победа верувал претседателот на ВМРО-ДПМНЕ, Христијан Мицкоски.

Таа укажа големото значење на жените во политиката и порача дека за сите ќе се грижи за сите еднакво.

„Ќе бидам претседателка и на левата и на десната страна. Ќе бидам претседателка на сите граѓани нема да правам разлика ниту по етничка ниту по верска ниту по полова ниту по било каква разлика. Време е за единство и за тоа ќе им се обратам на жените. Бидејќи ние покажуваме дека не се грижиме само за себе туку и за сите околу нас, посочи Силјановска во обраќањето кое беше посветено на улогата на жените во политиката и која треба да биде многу поголема“, рече новата претседателка Силјановска Давкова.