За смртта на 14 месечното бебе лекарите сториле низа на пропусти

„Некогаш некој чека 5 минути и е нервозен, сите чекаме некаде и во банка кога одиме чекаме 10 минути, па не викаме“, изјави министерот за здравство Арбен Таравари.

Тоа чекање го уби 14 месечното бебе. Докторите од детската клиника и „Козле“ направиле превид при проценката за прием и ненавремена проценка на тежината на болеста.

-Комисијата за стручен надзор нотираше превид во проценката за потреба од хоспитализација при вториот преглед на бебето на клиниката. Додека во Козле е констатирана неадекватна и ненавремена проценка на тежината на респираторните потешкотии и третманот, изјави Арбен Таравари, министер за здравство.

Таравари кажа дека извештајот од комисијата ќе биде испратен до двете клиники и до Етичката комисија во Лекарската комора и оти се надева дека ќе биде разгледан сериозно и ќе се преземат мерки.

-Непостоење на препораки или алгоритми за тријажа на пациентите при прием и понатамошен третман. Во однос на техничките недостатоци во Козле, констатирана е потреба од соодветна апаратура за давање респираторна поддршка инвазивна и неинвазивна, изјави Арбен Таравари, министер за здравство.

За случајот со 31-годишната родилка од Куманово која на 27 септември почина при породување на Одделението за гинекологија и акушерство во Општата болница во Куманово, комисијата не утврдила неправилности ниту при третманот на бременоста, ниту при породувањето.

-Заклучок на комисијата е дека недостатоците не може да бидат директна или индиректна за акутно влошување кон општата здравствена состојба на пациентката. Исходот по новороденчето е смртниот исход на родилката, изјави Арбен Таравари, министер за здравство.

На прес конференцијата за 100 дена Влада, министерот Арбен Таравари рече дека 60 до 70 отсто од граѓаните се задоволни од лекарите во јавното здравство, но новинарите дека не прават вести за нив.

Здравственот систем постои заради пациентите и тие се центарот во орбитата на здравствениот систем, изјави Арбен Таравари, министер за здравство.