Деведесет пријави за неправилности во здравствените установи пристигнале во Министерството за здравство, откри министерот Азир Алиу. Од нив, 60 се обработени. Пријавите пристигнуваат преку алатката на официјалната веб-страница на Министерството за здравство за пријавување неправилности.
-Од сите градови има, но најмногу во Скопје, но од секој град има по 1-2 вакви пријави. Секако, нашата работа е да постапуваме сѐ додека процениме дека навистина тие пријави имаат индикации дека треба да се продолжи со постапката. Досега само 2 од 60 обработени случаи се информации со индикации за понатамошна постапка, изјави министерот за здравство, Азир Алиу.
Алиу, исто така потсети и на измените направени во Законот за здравствена заштита. Како што потенцираше тој, создавањето семејство не треба да биде луксуз, туку право.
-Затоа ја отстранивме административната бариера, го удвоивме бројот на поддржани обиди за ин витро оплодување од 3 на 6 и ја дигитализиравме постапката, а времето за одобрување е скратено на само две недели. Нема повеќе чекање со месеци, нема повеќе изгубени документи по пошта, ќе има само една шанса, надеж и нов пристап. Истовремено, го поедноставивме процесот за лекување во странство, воведовме појасни одговорности во управувањето со Фондот и започнавме усогласување на правата на странските граѓани со оние на нашите граѓани, изјави министерот за здравство, Азир Алиу.
Министерството за здравство започна национална програма за менаџирање на кризи и отпорност на здравствениот систем, која, според министерот Алиу, утврдува стандардизирани протоколи, дигитална платформа за координација во реално време, обуки, симулациски вежби и интероперативна комуникација меѓу здравствените и безбедносните институции. Според него, Министерството за здравство започнува нова инвестициона фаза од 205 милиони евра за реконструкција и подобрување на здравствената инфраструктура во Штип, Тетово и Кичево.