Лидерите на албанските политички партии од земјава денеска во Тирана ќе се сретнат со премиерот на Албанија Еди Рама. Единствениот што нема да седне на оваа маса е Биљал Касами, претседател на Движењето Беса. Од оваа партија велат дека Ахмети и Груби го користат Рама за да се извлечат од калта каде што се две децении.
„И овој пат Артан Груби и Али Ахмети, не знаејќи како да се снајдат во оваа политичка ситуација создадена во Северна Македонија, наводно иницирале средба со албанскиот премиер, уште еднаш користејќи го него и неговиот авторитет за да се извлечат од калта каде што се заглавени две децении. Токму ова е причината што Движење БЕСА и претседателот Биљал Касами нема да седнат на маса со оние кои не успеаја да ја водат власта во државата“, велат од Беса.
Исто како БЕСА, и независниот пратеник Скендер Реџепи – Зејди не ја поддржува и не ја гледа оваа средба за плодна.
„Мислам дека оваа средба ќе спаси, но кого ќе спаси ќе видиме од утре. Всушност, самите Албанци се способни да се соберат и да организираат заеднички албански тркалезни маси овде во Македонија, нема потреба да се оди во Албанија или на друго место, бидејќи сметам дека е дојдено време политичкиот менталитет да ја покаже својата висока зрелост и време е албанските партии сами одлучуваат за судбината на Албанците овде. Но, освен тоа што ќе пијат кафе и ќе ручаат или вечераат, нема ништо друго позитивно“, додава Скендер Реџепи Зејди.
Македонската опозициска ВМРО-ДПМНЕ ваквиот развој на настаните го гледа како обид за спас на власта Ковачевски-Ахмети.
Министерот за надворешни работи Бујар Османи вчера изјави дека денешната средба во Тирана е новогодишна средба со цел размена на мислења за актуелните прашања во регионот и апелираше да не се создава „некаков заговор“ во врска со тоа. Средбата е закажана за вечерва во 19:30 часот.