Денес, на 178-та седница на Владата, помина Предлог-законот за заштита од употреба на производи од тутун или сродни производи.
Ова на социјалните мрежи го објави министерот за здравство Азир Алиу.
Како што вели, ова е важен чекор за јавното здравје и за заштита на децата, непушачите, работниците и граѓаните.
„Постојниот закон датира од 1995 година. По речиси три децении, реалноста е променета: денес имаме електронски цигари, нови никотински производи, онлајн рекламирање, социјални мрежи и нови форми на промоција кои директно влијаат врз младите.
Овој закон е резултат на долг процес на консултации, анализи и усогласување со институциите, инспекциските органи, угостителскиот сектор, индустријата, експертите, граѓаните и со професионална поддршка од Светската здравствена организација.
Со овој закон поставуваме појасни правила за јавните и работните простори, за терасите, за новите тутунски и никотински производи, за рекламирањето и промоцијата, како и за заштита на децата во близина на училиштата, здравствените установи и просторите каде што престојуваат деца.
Ова не е закон против никого.
Ова е закон за здравје, за деца, за почист воздух и за јавна одговорност.
Од законот од 1995 година до реалноста на 2026 година: денес не го забрануваме индивидуалниот избор, туку го штитиме здивот на нашите деца“, порача Алиу.