Arrestohen 5 shqiptarë për terrorizëm në Itali

Pesë shqiptarë, katër italianë dhe një kanadez përfunduan në pranga në operacionin antiterrorizëm, zhvilluar në Itali.
Autoritetet italiane dhe ato shqiptare nisën në orët e para të ditës së sotme një operacion të gjerë të shtrirë në Milano, Bergamo, Grosseto dhe në qytetin e Lushnjës, në Shqipëri.
Lajmi njoftohet nga mediat italiane, të cilat bëjnë të ditura se operacioni i koduar shqip “Martesë”, synonte të godiste një grup ekstremistësh që rekrutonin luftëtarë për ISIS-in.
“Huffington Post” shkruan se, operacioni “Martesë” është rezultat i një hetimi që ka nisur që në muajin tetor. Të arrestuarit janë pjesëtarët e një familje italiane, e konvertuar në besimin islam prej disa vitesh dhe një familje shqiptare, rezidente në Grosseto.
Lidhja e familjeve erdhi pas martesës së çiftit të ri shtatorin e kaluar, ndërsa mësohet se po organizonin një udhëtim për në Siri, për të luftuar krah xhihadistëve.