Италијанската воена база во Ербил, во ирачки Курдистан, беше погодена ноќеска во воздушен напад, но нема загинати или повредени меѓу припадниците на италијанските сили, соопштија официјални лица од италијанското Министерство за одбрана во четврток.
Министерството првично соопшти дека базата била цел на ракетен напад. Меѓутоа, извори од министерството подоцна појаснија дека станува збор за беспилотно летало кое уништило едно воено возило, можеби откако ја изгубило висината и паднало на подрачјето на базата.
„Нема загинати ниту повредени. Сите се добро“, соопшти министерството на платформата X веднаш по полноќ.
Според информациите од министерството, постои можност дронот да не бил наменски насочен кон италијанската база, туку случајно да ја погодил локацијата по губењето на контролата за време на летот.
Командантот на базата, полковник Стефано Пицоти, изјави за италијанскиот телевизиски канал Sky TG24 дека војниците неколку часа пред нападот биле предупредени за можни воздушни закани и се скрија во бункери.
Тој додаде дека во моментот на давањето на изјавата не било познато од каде дошол нападот. Според неговите зборови, воздушниот аларм во меѓувреме завршил, но експертите сè уште го прегледуваат теренот и обезбедуваат подрачјето на базата.
На официјалната веб-страница на италијанското Министерство за одбрана се наведува дека Италија во Ербил има околу 300 војници кои учествуваат во обука на курдските безбедносни сили.
Полковник Пицоти исто така изјави дека бројот на припадници на италијанските сили во последно време е намален поради зголемениот безбедносен ризик поврзан со војната против Иран, која ја започнаа Соединетите Американски Држави и Израел, пренесува Ројтерс.