Блинкен на разговори со Чавушоглу на 18 мај

ПОСЛЕДНИ ВЕСТИ

Турскиот министер за надворешни работи Мевлут Чавушоглу денеска изјави дека неговиот американски колега Ентони Блинкен го поканил на разговори на 18 мај, на кои двете членки на НАТО за првпат по три години ќе се обидат да ги подобрат односите.

Анкара и Вашингтон имаа неколку несогласувања, вклучително и околу купувањето на рускиот одбранбен систем С-400 од страна на Турција, што предизвика американски санкции и отстранување на Анкара од аранжманот за борбени авиони Ф-35.

Анкара потоа ги оцени овие потези на САД како нефер, објаснувајќи дека не може да набавува ракетна одбрана од сојузниците на НАТО под задоволителни услови.

Сепак, владите на двете земји почнаа заедничка иницијатива оваа недела за решавање на проблемот и зајакнување на соработката, вклучувајќи го и барањето на Турција да купи 40 Ф-16 и речиси 80 комплети опрема за модернизација на нејзината постоечка флота.

Говорејќи во Брисел по состанокот на земјите-членки на НАТО, Чавушоглу рече дека разговорите за Ф-16 добро напредуваат и ја поздрави оценката на американската администрација дека аранжманот ќе им служи на интересите на САД и НАТО.

Турција ги подобри односите со своите западни сојузници од почетокот на конфликтот во Украина.