Министерот за внатрешни работи Наќе Чулев, има став спротивен на Комисијата за заразни болести. Комисијата предлага да се воведе карантин од четврток навечер до понеделник наутро, додека Чулев смета дека мерките и престојниот викенд треба да бидат идентични како минатиот, односно да има карантин од сабота од 15 часот, до понеделник во 05 часот, со тоа што шумите ќе бидат користени само за рекреирање, но не и за групирање.
„Граѓаните се одговорни, совесни и генерално ги почитуваат мерките за ограничување на движењето. Тие се свесни за ризикот кој го носи заразата од Covid 19 и ги применуваат мерките за заштита на своето здравје.
На денешната седница на Координативниот штаб во владата уште еднаш го афирмирав мојот став дека неопходно е одлуките кои ќе се донесат да не бидат во насока на заострување на мерките за движење.
Во таа насока, а во пресрет на продолжениот викенд за 1 мај, сметам дека владата треба да донесе одлука која ќе биде идентична на изминатиот викенд. Секое ограничување кое ќе биде построго и поригирозно негативно ќе се одрази на граѓаните.
„И понатаму стојам на ставот дека шумите и планините треба да останат отворени во периодот кога е дозволено движењето за граѓаните, но тие да се користат за рекреирање, а не за групирање на граѓаните.
Апелирам до граѓаните да ги почитуваат одлуките кои се однесуваат на задолжителна употреба на соодветна заштитна опрема, а Министерството за внатрешни работи, односно полициските службеници и понатаму ќе стојат во првите редови во заштита на животот и здравјето на сите нас.“, напиша Чулев на својот профил на „Фејсбук“.