Од минатата година за запишување на децата со прво одделение, освен лекарски и стоматолошките контроли, задолжително се врши и очен преглед. И покрај тоа што во јавноста кружат информации дека од овие контроли е забележан пораст на бројот на децата кои имаат проблеми со видот, офталмологот Беким Татеши ги отфрла овие наводи. Објаснува колку е важна оваа мерка со цел рано откривање на проблемите со видот кај децата.
-Точно е дека пред уписот на децата имаме гужва пред амбулантите и од тој скрининг ги издвојуваме децата кои имаат проблем и тие потоа се лекуваат со протоколите што ги имаме. Не би рекол дека е зголемен бројот на децата со проблеми со видот, но оваа мерка е добра бидејќи децата со вакви проблеми се откриваат навреме и имаме време да ги третираме и да постигнеме да можат да гледаат без никакви проблеми-вели Татеши.
Според Татеши, поголем е бројот на децата со сместувачки спазам предизвикани од долгото фокусирање на кратки растојанија, што резултира со заматен вид. Тој додава дека употребата на паметни телефони и други слични технологии го истакнува проблемот што децата веќе го имаат.
-Доколку алудирате дека смарт-телефоните, лаптопите или компјутерските игри можат да влијаат врз порастот на проблемите со видот, не би се сложил во целост. Би рекол дека овие активности кај децата, само го откриваат проблемот што веќе го имаат. Има една проблематика што се нарекува сместувачки спазам кој се појавува кај децата кои подолго време се фокусираат на кратки растојанија, но ги има, нивниот број е малку повисок. Прекумерната, неограничената и неконтролираната употреба на овие уреди или технологии, секако дека ќе има влијание не само врз очите, туку и врз циркулацијата на крвта, недоволниот физички и ментален развој на децата. Затоа улогата на родителите е многу важна и неопходна-рече Татеши.
Колку порано се детектираат проблемите, толку полесно се лекуваат, објаснува Татеши, додавајќи дека идеалната возраст за очен преглед кај децата е четири години. Инаку, поради бројните негативни ефекти врз развојот на децата, Светската здравствена организација препорачува децата до две години воопшто да не се изложуваат пред екрани, по две години само еден час на ден, а од три до четири години не повеќе од еден час.