Координаторката на пратеничката група на Европскиот фронт, Рина Ајдари, рече дека имаат забелешки за Законот за прекршоци, кој е поврзан со имплементацијата на проектот „Safe City“.
Ајдари истакна дека побарале примена на албанскиот јазик, проширување на системот во други градови и начинот на казнување, кој според неа треба да биде предупредувачки, а не само казнувачки.
На прашањето дали ќе го поддржат законот ако не се исполнат овие барања, Ајдари одговори: „во принцип, да“.
„Имавме дискусии со експерти од МВР и со лица кои го изработиле законот и сите овие прашања се кристализирани на начин што измените и сите наши барања и забелешки ќе бидат реализирани или барем се работи на нив за да се решат.“, вели Ајдари.
„– Јасно е тоа, но ќе го гласате законот и без да се завршат процедурите и сите правила?“
Ајдари: „Во принцип, да, но има време до петок.“
„– Верувате дека ќе се направат?“
Ајдари: „Ќе се направат!“
Но, во еден момент на конференцијата се создаде конфузија, откако пратеникот Садула Дураку категорично изјави дека без овие измени нема да гласаат.
„Не, да не ги мешаме работите овде. Ако измените не се вметнат во законот, ако измените не се направат во законот, во принцип го поддржуваме законот, но ако измените не се направат, законот нема да се гласа.“, рече Дураку.
Од друга страна, Астрит Исени, заменик-министер за внатрешни работи од ВЛЕН, нагласи дека законот е поддржан од сите лидери на партиите и дека дури и без гласовите на ДУИ, бројките ќе бидат доволни.
„Не, не е било поставено условување. Верувам дека е постигнат договор и законот за прекршоци се очекува оваа недела да помине на прво читање. Кога ќе биде седницата, како што сме се договориле со координаторот на пратеничката група на ВЛЕН, Беким Ќоку, тоа ќе се случи в петок. Јас мислам дека законот за прекршоци во петок ќе има доволно гласови и без ДУИ. Добро е што е поддржан од сите лидери и треба да биде поддржан и од граѓаните.“, кажа Исени.
Од СДСМ велат дека законот ќе ја има нивната поддршка, но како прашање во Собранието ќе го постават и тоа како ќе се постапува со големата количина на податоци што овој систем ја генерира, како и со износот на казните. Инаку, се очекува законот да биде гласан во Собранието во петок.