Зголемена туристичката такса во Струга, но има сопственици кои не го плаќаат данокот и туристите ги држат на црно, односно непријавени. Струга само минатата година собрала околу 60 илјади евра од туристички такси. Сепак, има многу хотели кои 100% од заработка сакаат да си ја задржат за себе. Од општината велат дека го спроведуваат законот со проширени инспекциски контроли.
„Од туристичките такси во Струга се собрани околу 3,5 милиони денари кои се наменети за програми за туризам годинава, а ова ќе продолжи и во иднина“, вели Беса Зиба.
Дневната такса за туристи е 40 денари, истата важи и за хотелите, и за приватните сместувања. Но, не сите сакаат овие 40 денари да ѝ ги дадат на општината.
„На територијата на општина Струга категоризирани се вкупно 120 приватни субјекти кои нудат услуги како сместување за туристи. Продолжуваме со процесот на категоризација согласно потребите на граѓаните, па доколку има барања, екипа од општината од Струга оди и ја извршува својата задача“, додава Беса Зиба.
Согласно законот, глобата за неисполнување на обврската за правните лица се движи од 2.000 до 4.000 евра, а за физичките е предвидена парична казна од 600 евра.