Дизелот од ноќеска на полноќ поскапува за 2,5 денари, цената на 95 октанскиот бензин БС-95 се намалува за половина денар, а цената на 98 октанскиот бензин БС – 98 останува иста.
Пресметките на Регулаторната комисија не се совпаднаа со тие на Владата која очекуваше бензините да поевтинат, а цената на дизелот да остане иста. Па така од ноќеска на полноќ дизелот ќе се продава по 95 денари за литар, пресметано со попустот на Окта, наместо 92,5 денар. Цената на ЕУРОСУПЕР БС – 95 ќе биде 81,5 денари наместо 82, а ЕУРОСУПЕР БС – 98 ќе се продава по 83,5 денари за литар, исто како и сега. Ваква е математиката кога ќе се вкалкулираат сите мерки и попусти врз крајниот ефект на цените.
Цена на горивата од ноќеска на полноќ со вкалкулирани мерки и попусти
Моторен бензин ЕУРОСУПЕР БС – 95 81,50 (денари/литар)
Моторен бензин ЕУРОСУПЕР БС – 98 82,00 (денари/литар)
Дизел гориво ЕУРОДИЗЕЛ БС (Д-Е V) 95,00 (денари/литар)
Инаку Регулаторната комисија со денешната одлука ги утврди највисоките цени на горивата кои се повисоки во просек за 1,41%. Максималните цена за дизелот е 98 денари, за БС 95 е 83,5 денари, а за БС -98 цената е 85,5 денари. Но, во овие цени не се вкулкирани дополнителниот попуст од Окта за трговците.
Од 7.4.2026 година од 00:01 часот максималните малопродажни цени на нафтените деривати ќе изнесуваат:
Моторен бензин ЕУРОСУПЕР БС – 95 83,50 (денари/литар)
Моторен бензин ЕУРОСУПЕР БС – 98 85,50 (денари/литар)
Дизел гориво ЕУРОДИЗЕЛ БС (Д-Е V) 98,00 (денари/литар)
Масло за горење Екстра лесно 1 (ЕЛ-1) 95,50 (денари/литар)
Мазут М-1 НС 51,311 (денари/килограм)
Окта соопшти дека попустот ќе продолжи да важи до крајот на месецов. А регулаторна им препорача на трговците со нафта да го вкалкулираат на бензинските пумпи.
„РКЕ им укажува на нафтените компании да продолжат со постојната пракса и да го вкалкулираат обезбедениот попуст од страна на Владата со главниот добавувач ОКТА и да ги намалат малопродажните цени за 3 ден/лит за дизел и 2 ден/лит за бензините, со што ќе овозможат бенефитот од ова намалување директно да го почувствуваат граѓаните.“, велат од Регулаторната комисија за енергетика.
Премиерот пак утринава изјави дека со намалувањето на ДДВ-то, акцизите и со попустот од Окта, цената на бензините ќе се намали, а на дизелот ќе остане иста.
„Кога сето ова ќе се стави во функција, тогаш за бензините треба да имаме и поевтина цена од таа која што е сега, а за дизел горивата не би требало да имаме на одредени бензински пумпи покачувања и покрај тоа што имаме озбилна, предизвикувачка состојба во државата“, изјави Мицкоски.
Мицкоски кажа дека дневните загуби врз буџетот се мерат во најмалку милион евра дневно, поради мерките за намалување на ДДВ-то и акцизите. И дека доколку состојбите се влошат се размислува и за намалување на ДДВ и замрзнувања на цени и маржи на храната, за да се спречи инфлаторен шок.
Од Регулаторна пак соопштија, дека доколку вчера владата не го продолжеше времетраењето на намаленото ДДВ и не се интервенираше во акцизата, цената на бензините од ноќеска на полноќ, ќе беше повисока за 8,5 денари, а на дизелот за 12 денари за литар.
Моторен бензин ЕУРОСУПЕР БС – 95 92,00 (денари/литар)
Моторен бензин ЕУРОСУПЕР БС – 98 94,00 (денари/литар)
Дизел гориво ЕУРОДИЗЕЛ БС (Д-Е V) 110,00 (денари/литар)
Масло за горење Екстра лесно 1 (ЕЛ-1) 107,00 (денари/литар)
Инаку од почетокот на конфликтот на Блискиот исток цената на дизел горивото кај нас е покачена за околу 24 денари, или од 71 на 95 денари за литар. Експертите, бизнисот и земјоделците алармираа дека се потребни дополнителни мерки за да се заштитат граѓаните и за нафтениот шок да не се прелее врз храната. Премиерот пак кажа дека инфлацијата ќе расте и очекува да изнесува од 4 до 5 проценти.