Безбедносните служби во Литванија истражуваат инцидент со дрон што се урнал во северниот дел на земјата, откако, според првичните процени, леталото можеби навлегло во литванскиот воздушен простор од соседна Полска. Претседателот Гитанас Науседа ја обвини Русија за инцидентот, додека НАТО ангажираше борбени авиони за идентификација на објектот.
Литванскиот министер за одбрана Робертас Каунас соопшти дека дронот се урнал на територијата на оваа балтичка држава, членка на Европската Унија и НАТО.
Остатоците од леталото оштетиле цивилно возило што се движело во моментот на инцидентот. Според шефот на националниот центар за управување со кризи, Вилмантас Виткаускас, нема повредени лица.
Литванскиот претседател Науседа ја поврза случката со руската војна против Украина, оценувајќи дека последиците од конфликтот се чувствуваат и на источното крило на НАТО и Европската Унија.
„Руската агресивна војна против Украина се прелева на источното крило на НАТО и ЕУ“, напиша Науседа на социјалната мрежа Икс.
Тој посочи дека дронот експлодирал над северниот дел на земјата и претставувал опасност за цивилното население. Сепак, потеклото на леталото сè уште се истражува, а засега нема официјална потврда за тоа кој го испратил.
По инцидентот, литванските власти издадоа предупредувања за можна воздушна закана во неколку северни региони. Предупредувања добија и жителите на дел од соседните летонски региони што граничат со Литванија.
НАТО испрати борбени авиони
Во реакцијата на инцидентот биле ангажирани два италијански борбени авиона „Еурофајтер“, кои дејствувале под команда на НАТО. Нивната задача била да го идентификуваат објектот во литванскиот воздушен простор.
Сепак, поради временските услови, пилотите не успеале да воспостават визуелен контакт со леталото.
Портпарол на НАТО потврди дека Алијансата е во тесна комуникација со литванските власти и дека е во тек истрага за околностите на инцидентот.
Литванија ѝ предложила на Полска да спроведат заедничка истрага, со цел да се утврди од каде дошол дронот и како завршил на литванска територија.
Истражителите веќе пронашле делови од леталото, но засега не е утврдено дали дронот носел експлозив.
Пријавен и обид за подметнување пожар
Покрај инцидентот со дронот, литванскиот премиер Миндаугас Синкевичиус соопшти и за обид за подметнување пожар во објект во кој се наоѓа опрема за сателитска комуникација „Старлинк“.
Според премиерот, за инцидентот е одговорна Москва, но и ова тврдење треба да се разгледува во рамките на истрагата.
Во објектот се наоѓаат девет сателитски антени што обезбедуваат поврзување со системот „Старлинк“, кој ѝ помага на Украина во одржувањето на комуникациите.
Двата инцидента дополнително ја зголемија загриженоста за безбедноста во балтичкиот регион, во време кога земјите од источното крило на НАТО внимателно ги следат можните закани поврзани со војната во Украина.