Една четвртина од возачките без „северна“: Полицијата само опоменува, не казнува, барем засега

За време на празниците, граѓаните ослободени, барем за еден сообраќаен прекршок. Иако законот за безбедност во сообраќајот предвидува дека од 1 јануари не важат возачките дозволи со старото име на државата, министерот за внатрешни работи, Панче Тошковски пред неколку дена порача дека за сега ќе има само опомени.

Денеска е петти ден откако стапи на сила одлуката за продолжување на возачките дозволи и сообраќајните дозволи со новото уставно име, но не сите граѓани ги имаат сменето соодветните документи.

Граѓаните со поделени мислења за оваа ситуација. Некои велат дека не треба да се изрекуваат казни доколку документите се уште важат, а други велат дека само ако има казни, граѓаните ќе го дејствуваат побрзо.

Во меѓувреме МВР со апел до сите граѓани кои имаат возачка дозвола со старото име на државата, истите да ги заменат со нови. Во моментов една четвртина од возачите се со стари документи иако бројот на активни возачки дозволи во државава надмина 1 милион.

Полицијата соопштува дека се со зајакнати капацитети преземајќи мерки со цел граѓаните што побрзо да добијат документи со новото уставно име Северна Македонија. Постапката за подигање на личните документи, патните исправи и сообраќајните дозволи се одвива без проблеми и прекини, соопштуваат надлежните.