Новиот градоначалник на општина Пласница, Алија Јаоски го доби мандатот. Мандатот му го врачи в.д. градоначалникот Елсан Нурчевски кој со општина раководеше последните 5 месеци откако Исмаил Јаоски беше избран за пратеник во Собранието на Северна Македонија.
Исмаил Јаоски беше градоначалник на Пласница 20 години, а сега оваа функција ја презеде неговиот брат Алија Јаоски, кој рече дека ќе ги продолжи проектите кои ги започнал неговиот брат, а вети и нови.
Барањата на жителите од новоименуваниот градоначалник е да создаде услови за вработување на младите, со цел да запре масовното иселување.
Екс-градоначалникот на Пласница, пратеникот Исмаил, на денот на изборите пред новинарите го покажа гласачкото ливче и рече дека гласал против неговиот брат. На ова Алија Јаоски рече дека секој е слободен да гласа за кандидатот кој според него е најдобар.
Алија, рече дека повторно ќе се кандидира на локалните избори што ќе се одржат напролет, бидејќи според него, ова е очигледна победа наспроти политичките опоненти.