Турскиот претседател Таип Ердоган изјави дека за Турција е отворена нова страница во историјата откако мала фракција на Курдистанската работничка партија (ПКК) го положи оружјето претходниот ден.
„Од вчера, неволјата на тероризмот влезе во процес на завршување. Денес е нов ден, нова страница е отворена во нашата историја. Денес, вратите на голема, моќна Турција се широко отворени“, рече Ердоган.
Околу 30 борци на ПКК вчера го запалија своето оружје во северен Ирак на симболична церемонија што го означи почетокот на крајот на деценискиот бунт против Турција.
Во петокот, милитантите на ПКК, партија забранета во Турција, го положија своето оружје во северната ирачка покраина Сулејманија, ветувајќи дека ќе ја продолжат својата борба на легален и демократски начин, во потег што Турција го поздрави како конкретен чекор кон мирот.
Тие најавија премин од вооружена борба кон политички ангажман, потврдувајќи ја својата посветеност на „слобода, демократија и социјализам на легален и демократски начин“.
Церемонијата беше дел од петфазен план за траен мир. Ова следува по видеоповикот на затворениот курдски лидер Абдула Оџалан на 19 јуни и претходната изјава во февруари во која Оџалан ги повика своите борци да се разоружаат и да тргнат по политички пат.
ПКК го објави своето распуштање во мај и ја повика турската влада да го ослободи Оџалан, кој од 1999 година се наоѓа во турски затвор на островот Имрали, и да преземе сериозни чекори кон политичко решение на курдското прашање. Исто така, ги повика регионалните и меѓународните актери да го поддржат мировниот процес.