Двопартиската коалициска влада на естонскиот премиер Кристијан Михал го загуби парламентарното мнозинство во вторник откако по еден пратеник од секоја партија се откажа, објави локалното радио. Коалицијата на Михал, составена од Реформската партија и Естонија 200, сега држи 50 од 101 места во Риигикогу, естонскиот парламент, во споредба со 52, откако Меелис Киили од Реформската партија и Калев Стоическу од Естонија 200 поднесоа оставки.
„Естонија во моментов има малцинска коалиција“, напиша премиерот Михал на Фејсбук. „Нема причина да се разубавува или драматизира ова“, рече тој, додавајќи дека неговата коалиција „функционира како малцинска влада де факто од минатата година“. Михал нагласи дека неговата влада ќе продолжи да се стреми кон поширок консензус во парламентот.
Кили ја оправда својата одлука да се повлече наведувајќи ги своите ставови за националната одбрана и безбедност, за кои рече дека се повеќе различни од политичките ставови на економски либералната Реформска партија на Михал.
Стоическу претходно објави на Фејсбук дека ја напушта либералната партија Естонија 200, без да даде детали. Политичките набљудувачи веруваат дека потегот на двајцата пратеници е обид да се дистанцираат од владата, за која анкетите велат дека е непопуларна, и да се позиционираат пред парламентарните избори во март 2027 година.
Останува нејасно како Киили и Стоическу ќе гласаат на претстојните претседателски избори откако ќе ги напуштат владејачките партии. Естонскиот претседател го избира парламентот, кој треба да го стори тоа на 2 септември.