Германскиот конзервативен лидер Фридрих Мерц не успеа да го освои мнозинството потребно за да стане канцелар во првиот круг од гласањето во Бундестагот.
Никогаш претходно не се случило назначениот канцелар, по успешните коалициски преговори, да не биде избран во првиот круг од гласањето, пренесува Билд.
Долниот дом на парламентот, или Бундестагот, сега има 14 дена да го избере Мерц или друг кандидат за канцелар со апсолутно мнозинство, објави Ројтерс.
Конзервативниот блок ЦДУ-ЦСУ на Мерц победи на националните избори во февруари, но со 28,5 проценти од гласовите, за што беше потребен барем еден коалициски партнер.
Мерц се согласи да формира коалиција со социјалдемократите, кои освоија само 16,4 проценти, што е нивниот најлош резултат во повоената историја на Германија.