Холандскиот министер за надворешни работи Каспар Велдкамп денес поднесе оставка по неуспешниот состанок на кабинетот за можни санкции против Израел, објави новинската агенција ANP.
„Гледам дека не сум во позиција да преземам никакви значајни дополнителни чекори за да извршам притисок врз Израел“, рече тој.
Израелските министри од крајната десница беа прогласени за персона нон грата
Велдкамп вчера изјави дека сака да преземе дополнителни мерки против Израел, откако во јули ги прогласи израелските министри од крајната десница Итамар Бен-Гвир и Безалел Смотрих за „персона нон грата“, односно непожелни лица. Холандскиот министер посочи дека мерките што ги предложил биле „сериозно дискутирани“, но наишле на отпор на неколку состаноци на кабинетот.
Холандија беше меѓу 21 земја што потпишаа заедничка изјава во четвртокот, нарекувајќи го одобрувањето на Израел за голем проект за населување на Западниот Брег „неприфатливо и спротивно на меѓународното право“.