Хрватскиот премиер Андреј Пленковиќ, изјави дека е уверен дека ЕУ нема да воведе санкции за претставниците на Република Српска. Тој додаде дека Хрватска нема да воведува санкции.
-Ми се чини дека иницијативата за усвојување санкции на ниво на ЕУ нема да помине. Следејќи ги позициите на земјите-членки, тоа не е реално, изјави синоќа Пленковиќ во Мостар по средбата со претседателот на ХДЗ БиХ Драган Човиќ.
Пленковиќ изјави дека Хрватска не е во иста позиција како некои земји од ЕУ.
-Ние сме првите соседи, Бањалука е буквално на час и половина од Загреб и од таа страна сакаме да испратиме смирувачки пораки кои ќе поттикнат дијалог, ќе ги вратат работите на вистинското место, а вистинското место е да се најдат решенија за иднината на БиХ меѓу политичките партии и институциите во БиХ, рече Пленковиќ.
Тој посочи дека се друго не е добро, бидејќи тоа би довело до поголеми тензии, забавување на европскиот пат и лоша економска состојба.
Пленковиќ истакна дека Босна и Херцеговина нема друг пат освен европскиот, кој ќе обезбеди хармонично функционирање на БиХ.