Уставната седница на косовското собрание денес беше прекината кратко откако пратеничката од опозицијата Тиме Кадријај фрли јајца врз вршителот на должноста премиер на Косово, Албин Курти.
Курти е исто така лидер на Движењето Самоопределување (Ветевендосје), партијата што освои најмногу места на предвремените парламентарни избори на 7 јуни, но нема доволно претставници за независно мнозинство. Самоопределување има 53 од 120 места во парламентот.
Седницата започна со повеќе од еден час задоцнување. Претседателот на собранието Авни Дехари утврди дека во салата има 109 пратеници, по што му даде збор на Курти.
Курти повторно побара дополнително време за политички консултации. Тој рече дека сè уште не постигнал договор со другите партии и дека сака да избегне уште едни предвремени избори.
„Сè уште немаме политички договор, па за да избегнеме нови избори, барам дополнително време“, рече Курти.
Кога се врати на своето место по говорот, пратеничката на Алијансата за иднината на Косово (ААК), Тиме Кадријај, го гаѓаше со јајца. Пратениците на Самоопределување веднаш станаа и се собраа околу својот лидер, а Дехари повика обезбедување и ја прекина седницата.
Инцидентот се случи во услови на долготраен политички ќорсокак во Косово. Изборите на 7 јуни беа третите парламентарни избори за само 18 месеци. Самоопределување повторно убедливо освои најмногу гласови, но не го обезбеди потребното мнозинство за самостојно формирање влада.
Дополнителен проблем е изборот на нов претседател на Косово, за што е потребна многу поширока политичка поддршка.
Конститутивната седница започна во четврток, кога пратениците положија заклетва, но беше прекината и откако Курти побара дополнително време за разговори.
Според одлуката на Уставниот суд, новиот парламент мораше да се конституира во рок од 30 дена од потврдувањето на конечните резултати од изборите. Тој рок истече синоќа на полноќ, а Уставот на Косово не пропишува јасно што ќе се случи ако претставниците не ја исполнат оваа обврска во предвидениот рок.