Иран во неделата изјави дека конфликтот со САД и Израел може да се реши само преку дипломатија, откако американскиот претседател Доналд Трамп соопшти дека го отфрлил иранскиот предлог за повторно отворање на Ормускиот теснец и за ставање крај на конфликтот.
„Нашите услови се јасни и секој чекор кон повторно отворање на Ормускиот теснец зависи од исполнувањето на тие услови“, напиша иранскиот министер за надворешни работи Абас Аракчи на социјалните мрежи.
„Само решение постигнато преку преговори може да ги извлече од овој ќорсокак“, додаде тој.
Минатата недела, за време на седницата на Генералното собрание на ОН во Њујорк, Иран претстави мировен предлог за кој наведе дека бил пренесен до американската страна преку катарски посредници.
Трамп во саботата изјави дека го отфрлил предлогот, тврдејќи дека Иран сака договор бидејќи е под огромен притисок.
„Тие сакаат да постигнат договор за итно отворање на Ормускиот Теснец бидејќи трпат тешки загуби“, им рече Трамп на новинарите во Белата куќа.
И покрај јавните изјави на Трамп, Аракчи рече дека посредниците во разговорите меѓу Техеран и Вашингтон сè уште официјално не го известиле Иран дека американската страна го отфрлила предлогот.
„Чекаме посредниците да ни го пренесат конечниот став, па врз основа на тоа ќе донесеме одлука“, изјави Аракчи.
САД воведоа економска блокада врз Иран за да извршат притисок врз Техеран да ги запре нападите врз бродовите во Ормускиот Теснец. Овие напади драстично го намалија поморскиот сообраќај низ овој стратешки важен воден пат, иако Трамп постојано тврди дека САД го контролираат теснецот.
„Волстрит џурнал“ прв објави дека Трамп го отфрлил иранскиот предлог, повикувајќи се на неименувани американски функционери.
Според весникот, Трамп приватно е скептичен дека Иран ќе ги исполни неговите барања и им кажал на своите соработници дека смета оти е веројатна кампања на бомбардирање по изборите за американскиот Конгрес во ноември.
Сепак, еден американски функционер претходно ги опиша разговорите со Иран, кои се водеа преку посредници, како „позитивни и конструктивни“.
Иранскиот воен началник Амир Хатами изјави дека војната влегла во „критична и одлучувачка фаза“. Тој додаде дека Техеран нема да прифати ситуација во која Иран не може да тргува, додека странските сили истовремено ги користат стратешките водени патишта во регионот.