Денес е последниот ден за повлекување на 52,5 милиони евра од ЕУ, но три министерства не ги исполниле условите за реализација на овие неповратни грантови. Во рокот од 12 месеци обврските не се исполнети, но од Министерството за европски прашања велат дека овие средства не се загрозени да се изгубат. Министерот Орхан Муртезани изјави дека е поднесено првото барање за ослободување на фондовите во износ од 17 милиони евра, од кои повеќе од 9 милиони евра се однесуваат на капитални инвестиции.
Во отчетот за првата година од мандатот на ова министерство, Муртезани изјави дека актуелната листа опфаќа 19 проекти со вкупна вредност од 1,1 милијарда евра. Четири грантови за техничка помош се добиени во рамки на Инвестициската рамка за Западен Балкан, два проекти за техничка помош и два инвестициски гранта се аплицирани како техничка помош за Северна Македонија. Министерот истакна дека Бугарија има различни ставови од ЕУ во врска со интегративниот пат на земјата.
Паралелно, посочи тој, се координира ревидирањето на инвестициските проекти во рамки на Инструментот за реформи и раст од Реформската агенда и планирање на процесот на инвестициската рамка за Западен Балкан. Во исто време, Муртезани рече дека е финализирано програмирањето на ИПА фондовите за 2025-2027 година, со 67 милиони евра насочени кон стратешки сектори, вклучувајќи владеење на правото, образование, јавна администрација и иновации.