Со настапот на „Џез за Чудаци“ вечерва во Прилеп продолжува 15. јубилејно издание на „Прилеп џез викенд“. Утревечер фестивалската публика ќе има можност да ги проследи настапите на „Пијан славеј“ и „PEACH VICE“.
Фестивалот започна синоќа во киното „Мис Стон“ со настапите на Глигор Кондовски, Дориан Јовановиќ и групата „Сетстат“. Програмата ќе трае до сабота, 3 октомври.
Во изминатите 15 години, „Прилеп џез викенд“ прерасна во препознатлив културен настан, на кој настапиле бројни музичари од Македонија и од регионот.
Организаторката Снежана Ристеска вели дека интересот на публиката и поддршката од уметниците се главниот мотив фестивалот да продолжи, и покрај предизвиците со кои се соочувал низ годините.
Таа посочува дека фестивалот придонесува Прилеп да биде дел од културната мапа на земјава и регионот, а џезот постепено добива сè поширока публика.
Според Владан Дробицки од „Сетстат“, македонската џез-сцена има два главни сегмента – мејнстрим и алтернативна сцена. Тој особено ја издвојува андерграунд сцената, која, како што вели, е исклучително активна и разновидна.
Музичарот Дориан Јовановиќ оценува дека џезот во Македонија денес има жива и разновидна сцена, а како значаен чекор го посочува и постоењето на Националниот џез оркестар.
Фестивалот „Прилеп џез викенд“ е финансиски поддржан од Општина Прилеп.