Легендарниот канадски рок музичар Нил Јанг го најави новиот студиски албум „Second Song“, кој го сними со својот бенд The Chrome Hearts, а воедно ја објави и истоимената насловна песна.
Албумот ќе биде објавен на 18 септември за издавачката куќа Reprise Records и претставува продолжение на минатогодишното издание „Talkin’ To The Trees“. На него ќе се најдат седум композиции, од кои пет се целосно нови, како и две досега необјавени верзии на песните „Casting Me Away From You“ и „I’ll Love You Forever“.
Насловната песна „Second Song“ носи мирна и мелодична атмосфера, а во неа Јанг размислува за животот, времето и надежта, испраќајќи порака за заедништво и иднината.
Музичарот претходно откри дека дел од инспирацијата за албумот ја пронашол во незадоволството од актуелната политичка состојба во САД и од администрацијата на претседателот Доналд Трамп. Сепак, истакна дека музиката повторно му донела чувство на радост и креативна енергија.
Во соопштението за албумот се наведува дека „Second Song“ е дело кое „го обединува минатото со надеж за иднината“ и нуди музика што треба да им помогне на слушателите полесно да се соочат со предизвиците на денешното време.
Новиот албум ќе ги содржи следните песни: „The Foggy Edge of Time“, „Day After Day“, „Earth Girl“, „Second Song“, „Casting Me Away From You“, „Soon I Might Be Going“ и „I’ll Love You Forever“.
Јанг неодамна ја откажа целата британска и европска турнеја, објаснувајќи дека му е потребна пауза и дека решил да го послуша сопственото тело пред повторно да се врати на концертната сцена.