Për varrezat që u bë shumë bujë është qetësuar situata. Në fshatin Llapushnik të Drenasit do të vazhdoj puna për ndërtimin e varrezave katolike. Ndërtimi i tyre u ndërpre për shkak të protestave të një pjesë të banorëve të fshatit.
Për këtë njofton përfaqësuesi i komitetit Ramadan Gashi, i cili përmes një njoftimi për media thotë se kanë arritur marrëveshje pas një takimi që është mbajtur mes banorëve.
Në njoftimin e Gashit thuhet se qysh nesër do të vazhdojnë punimet, ashtu siç ishte afati i paraparë.
“Ne si banorë të fshatit Llapushnik, vazhdojmë dhe do të punojmë në tolerancën dhe vëllazërinë që kemi trashëguar brez pas brezi”, thuhet në njoftimin e dërguar nga përfaqësuesi i komitetit, Ramadan Gashi.
Për të gjitha paqartësitë procedurale dhe ligjore, u tha se komiteti fton Ministrinë e Mjedisit dhe Planifikimit Hapësinor dhe Komunën e Drenasit që të njoftojnë opinionin për anën ligjore të këtyre procedurave.
Punimet për ndërtimin e varrezave dhe kishës të katolikëve në Llapushnik të Drenasit ishin pezulluar për një muaj.
