Американскиот технолошки гигант „Мајкрософт“ денес објави дека планира да отпушти околу 9.100 вработени, или околу четири проценти од вкупната работна сила, а одделот за игри ќе биде најтешко погоден.
Директорот на гејмерската дивизија Xbox (Xbox), Фил Спенсер, во порака до тимот изјави дека отпуштањата се неопходни за зголемување на агилноста и ефикасноста, објави „Сиетл Тајмс“.
„Денес донесуваме тешки одлуки за да обезбедиме успех во годините што доаѓаат“, рече Спенсер.
„Мајкрософт“ бележи добри резултати во одделот за игри, но менаџментот вели дека селективното инвестирање е клучно за долгорочна одржливост, објавува порталот „Верџ“.
Секој кој ќе биде отпуштен ќе добие отпремнина, здравствено осигурување и поддршка при наоѓање нова работа, се додава во соопштението.
Компанијата претходно отпушти повеќе од 6.000 вработени во мај и јуни. Во јуни 2024 година, „Мајкрософт“ вработи околу 228.000 луѓе низ целиот свет.