Мароканскиот крал Мохамед Шести ја именуваше Фатима Езахра Ел Мансури за прва жена премиер на земјата, по победата на нејзината либерално-центристичка партија на парламентарните избори.
Кралот побара од Ел Мансури да формира нова влада, се наведува во соопштението од палатата. Нејзината партија „Автентичност и модерност“ (ПАМ) е основана во 2008 година на иницијатива на кралски советник и оттогаш се позиционира како противтежа на исламистичката Партија за правда и развој (ПЈД), застапувајќи се за општествена модернизација и посекуларни ставови, пренесува Ројтерс.
Мароко е уставна монархија во која кралот задржува широки овластувања во однос на надворешната политика, одбраната и други клучни ресори. Според мароканскиот устав, кралот го именува шефот на владата од политичката партија што ќе освои најмногу пратенички места во Претставничкиот дом.
Таа ќе мора да се справи со широко распространетото незадоволство кај младите.
ПАМ, претходно втора по големина партија во владејачката коалиција, изби на првото место благодарение на вклученоста на Фузи Лекџа – претседател на Мароканската фудбалска федерација и висок функционер за државниот буџет – кој ѝ се приклучи на партијата само неколку недели пред изборите.
Ел Мансури, адвокатка која претходно ја извршуваше функцијата министерка за домување и градоначалничка на Маракеш, ќе ги предводи преговорите за формирање коалициска влада и ќе му ја поднесе листата со членови на кабинетот на кралот на одобрување. Новата влада ќе ги надгледува завршните фази од проектот вреден 20 милијарди долари за подготовка за Светското првенство во фудбал во 2030 година, на кое Мароко ќе биде кодомаќин заедно со Португалија и Шпанија.
Таа исто така ќе треба да спроведе економски реформи за да одговори на широко распространетото незадоволство кај младите – прашање што стана актуелно по масовниот наплив на луѓе кон границата на шпанската енклава Сеута во јули и смртоносните протести на припадниците на „Генерацијата З“ минатата година.