Руското Министерство за надворешни работи соопшти дека ставот на Москва за евентуален мировен договор со Украина се променил за да ги одрази вестите од бојното поле, каде што руските сили остваруваат територијални придобивки во последните недели.
На прашањето на Ројтерс дали ставот на Русија останал ист како во јуни 2024 година, кога Владимир Путин побара Украина формално да се откаже од членството во НАТО и да ги повлече своите трупи од четири украински региони што Русија ги смета за свои, портпаролката Марија Захарова одговори:
„Да, има промени во ставот на Русија“.
„Овие промени се засноваат на промени на терен“, рече Захарова. Сè уште се чека потврда дали имало директен контакт меѓу украинската и руската делегација во Турција.
Рускиот амбасадор со посебни овластувања, Родион Мирошник, изјави дека Украина сака да разговара само за прекин на огнот, што, според него, е „некомпатибилно со рускиот пристап“. Тој додаде дека досега не е постигнат договор меѓу двете делегации, што – со оглед на тековните тензии и меѓусебното непријателство – не го смета за изненадувачки.